Архангай аймгийн Хөгжимт драмын театрын барилгын ажил нь 2013 оноос эхэлсэн бөгөөд энэ онд багтаан ашиглалтанд оруулахаар төлөвлөн ажиллаж эхэллээ. Тус барилга нь 2013-2021 онд улсын төсвийн хөрөнгө оруулалтаар 13,2 тэрбум төгрөгийн төсвөөр баригдаж байгаа бөгөөд ажлын явц 80 хувьтай үргэлжилж байна.

Өнөөдөр ИТХ-ын дарга Б.Батжаргал, аймгийн Засаг дарга Д.Золжаргал нар болон холбогдох газар хэлтсийн удирдлагууд барилгын явцтай танилцаж, албаны хүмүүсээс мэдээлэл авлаа. Мөн цаашид авах арга хэмжээ, шийдлийг хэлэлцэж, ашиглалтанд орох хугацааг дахин сунгахгүйгээр, хүлээлгэн өгөхийн тулд үйл ажиллагааг эрчимжүүлхийг анхааруулсан юм. Түүнчлэн, тус барилгын нийт ашиглалтын талбай 11,080 мкв бөгөөд халаалт, дэд бүтцийн зардал маш өндөр гарахаар тооцоологдож байна. Иймээс дотоод үйл ажиллагааны менежментийн асуудал, бүтэц зохион байгуулалтыг оновчтой шийдвэрлэх нь чухал хэмээн уулзалтын төгсгөлд хэлэлцэв.