АХМАД ЗУРАГЧИН Б.ЦЭЭПИЛ АНХНЫХАА ГЭРЭЛ ЗУРГИЙН ҮЗЭСГЭЛЭН ГАРГАВ

16195794_714264612074772_1297976610725002565_n

Гэрэл зурагчин Б.Цээпил бие даасан анхныхаа үзэсгэлэнгээ аймгийн номын сангийн үзэсгэлэнгийн танхимд гаргалаа. Тэрээр байгалийн зургийг зорин зорин очиж дарах дуртай нэгэн юм. Үзэсгэлэндээ өөрийн 800 гаруй бүтээлээс шилж, сонин тогтоц бүхий байгаль эхийн болон иргэдийн аж амьдрал харуулсан 120 зургийг дэлгэсэн байна. Үзэсгэлэнгийн нээлтийн үеэр аймгийн Засаг дарга Ц.Мөнхнасан “гавьяат цол”-оор энгэрээ мялаахыг ерөөж, хүндэтгэл үзүүллээ. Мөн аймгийн ИТХ-ын нарийн бичгийн дарга М.Батдорж, ЗДТГ-ын дарга Б.Цэрэннадмид гээд бусад байгууллагын удирдлагууд, гэрэл зураг сонирхогчид, иргэд гээд олон хүн үзэсгэлэнг сонирхлоо. Зурагчин Б.Цээпил нь залуудаа мужааны ажил хийдэг байж байгаад 1992 оноос зах зээлд шилжих үеэр гэрэл зургийг сонирхон орсноос өдгөө 25 жилийг ардаа үлдээжээ. Өдгөө 58 настай ч залуучуудынхаа дунд үлгэр дуурайл болж, зааж сургаж яваа ахмад гэрэл зурагчин юм. Хэд хэдэн шавь бэлтгэж байгаа бөгөөд тэдэндээ аппарат хэрэгсэлтэйгээ харьцахаас эхлээд зургийн гэрэл сүүдрийг хэрхэн тааруулах, харуулах өнцөг нь юу байх, эгзэгтэй агшинг яаж хальснаа авч үлдэх гээд олон талаар нь зааж сургадаг байна.

Энэхүү гэрэл зургийн үзэсгэлэн гурав хоног үргэлжилнэ.