Архангай аймгийн малын шүлхий өвчин гарсан сумын хорио цээрийн дэглэмийг цуцлав

28661196_1882368675318914_3136742211039474101_n Архангай аймгийн Засаг даргын энэ сарын 7-ны өдрийн захирамжаар Мэргэжлийн хяналтын байгууллагын санал, дүгнэлтийг үндэслэн Хотонт сумын нутагт гарсан малын гоц халдварт шүлхий өвчний хорио цээрийн дэглэмийг тавдугаар сарын 7-ны өдрөөс эхлэн цуцалж, хээрийн штаб, хяналтын постуудыг буулгаж, шатахуун түгээх станцын үйл ажиллагааг хэвийн горимд шилжүүлэв. Мөн ХХААХҮ-ийн сайдын А/93 тоот тушаал, аймгийн Онцгой комиссын хурлын шийдвэрийг үндэслэн Өгийнуур сумын нутагт гарсан малын гоц халдварт шүлхий өвчний хорио цээрийн дэглэмийг тавдугаар сарын 14-нөөс бууруулж, хязгаарлалтын дэглэмд шилжүүлж, энэ сарын 18-ны өдрийн аймгийн Засаг даргын захирамжаар Ихтамир сумын шүлхий өвчний хорио цээрийн дэглэмийг цуцаллаа. Хорио цээрийн дэглэмийг бууруулж, цуцалж байгаатай холбоотойгоор дээрх гурван сумын Засаг дарга нарт шүлхий өвчнөөс урьдчилан сэргийлэх, малын шилжилт хөдөлгөөнд хяналт тавих, малчид, иргэдэд мэдээлэл хүргэж ажиллахыг үүрэг болгосон байна.

Онцгой байдлын 25 алба хаагч орон сууцны түлхүүрээ гардан авав

31959612_2067131863534056_3273961154929491968_n Архангай аймгийн ОБГ-ын алба хаагчид шинэ орон сууцны түлхүүрээ энэ сарын 6-нд гардан авлаа. Онцгой байдлын албаны албан хаагчдын нийгмийн баталгааг хангах дунд хугацааны хөтөлбөрийн хүрээнд Архангай аймгийн Онцгой байдлын газрын алба хаагчдын 25 айлын орон сууцны барилга баригдсан юм.Орон сууцны нээлтийн ажиллагаанд Онцгой байдлын ерөнхий газрын Тэргүүн дэд дарга бөгөөд штабын дарга, бригадын генерал Г.Ариунбуянболон аймаг ороннутгийн удирдлагууд, байгууллагын дарга нар оролцлоо. Тус 5 давхар 25 айлын орон сууцанд Онцгой байдлын газрын 8 офицер, 13 ахлагч, 1 гэрээт ажилтан, 2 ахмад ажилтанхөнгөлттэй үнэ, төлбөрийн уян хатан нөхцөлтэйгээр орж байгаа юм.Тус барилга ашиглалтанд орсноор ОБГ-ын нийт алба хаагчдын 50 хувь нь орон сууцаар хангагдаж байгаа юм. Энэ нь аюул гамшгийн дуудлагаар өдөр, шөнийн аль ч цагт дуудагдан, олон хоногоор ажилладаг аврагч, гал сөнөөгчдийн хувьд ая тухтай орчин нөхцөлд амьдрах, ар гэртээ санаа зовохгүй албан үүргээ гүйцэтгэх нөхцөл боломж бүрдэж байна. Барилгыг Ж.Нэргүй захиралтай “Гурван тамир” ХХК гүйцэтгэж 2017 оны 04 дүгээр сард барилгын ажлыг эхлүүлж, 2018 оны 05 дугаар сарын 03-ны өдөр улсын комисст хүлээлгэн өгсөн юм.

Шатрын улсын аварга шалгаруулах тэмцээн Архангайд болно

32116598_963574150477149_2137915075044835328_n Эрэгтэйчүүдийн 58, эмэгтэйчүүдийн 50 дахь удаагийн шатрын улсын аварга шалгаруулах тэмцээн энэ сарын 18-27-ны өдрүүдэд Архангай аймагт болно. Энэ нь шатрын улсын аварга шалгаруулах тэмцээн орон нутагт 10 дахь удаагаа, Архангай аймагт анх удаагаа зохион байгуулагдаж байгаа юм байна. Энэ жилийн тэмцээнийг УИХ-ын гишүүн Ё.Баатарбилэг, Ж.Мөнхбат, Г.Тэмүүлэн нарын ивээл дор “Эртний хаадын өлгий-Арын сайхан Хангай” нэртэйгээр Монголын шатрын холбоо аймгийн ИТХ, ЗДТГ, БТСГ-тай хамтран зохион байгуулна. Шатрын улсын аварга шалгаруулах тэмцээнд хагас шигшээгээс шалгарсан шилдэг эрэгтэй 12, эмэгтэй 12 шатарчин оролцох юм. Үүнээс эрэгтэй 2, эмэгтэй 2 шатарчин нь Архангайн аймгийн харьяат, гавьяат тамирчид байгаа ажээ. Тэмцээний үеэр Архангайд шатрын спортыг хөгжүүлэх зорилгоор аймгийн Биеийн тамир спортын газарт хөлөгт тоглоомын танхимын үйл ажиллагааг эхлүүлнэ гэж байна. Мөн тэмцээний бэлтгэл ажлын хүрээнд Эрдэнэбулган, Тариат, Цэнхэр, Батцэнгэл сумдын багш нарт шатрын сургалтыг явуулах гэнэ. Энэ удаагийн тэмцээн нь аймгийн Засаг даргын үйл ажиллагааны хөтөлбөрт туссан “Ирээдүй 1+1” хөтөлбөрийн хүрээнд зохион байгуулагдаж буйгаараа онцлог ажээ.

УИХ-ЫН ГИШҮҮН, ХҮНС, ХӨДӨӨ АЖ АХУЙ, ХӨНГӨН ҮЙЛДВЭРИЙН САЙД Б.БАТЗОРИГ АРХАНГАЙ АЙМАГТ АЖИЛЛАЛАА.

31649343_2073962075967139_7490334273149337600_n Монгол Улсын Засгийн газраас баталсан Малын эрүүл мэнд хөтөлбөрийг хэрэгжүүлэх ажлын хүрээнд болон Засгийн газрын 2018 оны 04 дүгээр сарын 27-ны өдрийн хуралдааны тэмдэглэлээр өгсөн үүрэг даалгаврын дагуу мал сүргийг өвчнөөс урьдчилан сэргийлэх болон малын үржүүлэг, селекцийн ажил, үйлчилгээг хэрэгжүүлэх бүх нийтийн ажил болгон аян хэлбэрээр зохион байгуулах нээлтийн арга хэмжээг Архангай аймагт албан ёсоор зохион байгууллаа. Нээлтийн үйл ажиллагаанд Хүнс, хөдөө аж ахуй, хөнгөн үйлдвэрийн сайд Б.Батзоригоор ахлуулсан ажлын хэсэг ирсэн бөгөөд аймгийн Онцгой комиссын мэргэжлийн ангиуд жагсаж, аймгийн Засаг дарга бөгөөд аймгийн онцгой комиссын дарга Ц.Мөнхнасан үг хэлж хүндэтгэл үзүүллээ.

31754575_2073962095967137_1188089852172697600_o Сайд аймагт ажиллах хугацаандаа Хүнс, хөдөө аж ахуйн газрын ажилтнуудтай уулзаж үүрэг чиглэл өгч санал хүсэлтийг сонсон, Аймгийн мал эмнэлгийн ажил үйлчилгээний хувийн нэгжүүдэд вакцин, био бэлдмэлийн дээжийг гардуулж өглөө. Мөн Булган сумын Шарга морьтод хаваржиж буй малчин Х.Батчулууны хотонд очиж мал эмнэлгийн урьдчилан сэргийлэх арга хэмжээг хэрэгжүүлж байгаатай танилцлаа.

АЙМГИЙН ЗАСАГ ДАРГА ӨНДӨР-УЛААН, ТАРИАТ СУМДАД АЖИЛЛАВ.

29680538_942623669238864_1411186994_o

Архангай аймгийн Засаг дарга Ц.Мөнхнасангаар ахлуулсан ажлын хэсэг энэ сарын 26-нд Өндөр-Улаан, Тариат суманд ажиллалаа. Аймгийн Засаг дарга сумдын хаваржилтын бэлтгэл байдалтай танилцаж, малчдад өвс, тэжээлийн тусламж үзүүлэх, Засгийн газраас болон аймаг орон нутгаас авч хэрэгжүүлж байгаа цаг үеийн талаарх мэдээ, мэдээллийг хүргэж, ард иргэдийн санал хүсэлтийг сонсож, газар дээр нь шийдэх боломжтой асуудлуудыг газар дээр нь шийдэн ажиллаж байна.

29352417_942611569240074_5287728007203186112_o

Сумдад ажиллах энэ үеэрээ сум болгонд 470 боодол өвс, 150 шуудай хивэг, 520 ширхэг ашигт долооцыг хүлээлгэж өглөө. Эдгээр өвс, хивэг, долооцыг 80 хувийн хямдралтай үнээр буюу нэг шуудай хивгийг 3000, нэг боодол өвсийг 2000, нэг ширхэг долооцыг 900 төгрөгөөр тус тус өгсөн. Аймгийн Засаг даргын зүгээс тухайн сумын удирдлагуудад эдгээр өвс, долооц хэрэгтэй байгаа хүмүүст нь тэгш хувааж өгөхийг үүрэг болголоо.

“Ээждээ захидал бичээрэй” аймгийн уралдаанд 200 гаруй захидал иржээ

28880056_931404903694074_1363469644_o Архангай аймгийн нийгэм, улс төр, танин мэдэхүйн мэдээллийн 10 хоног тутмын “Архангайн толь” сонин, аймгийн Номын сантай хамтран жил бүр зохион байгуулдаг “Ээждээ захидал бичээрэй” аймгийн захидлын уралдааны дүн гарлаа. Уралдааны зорилго нь хүүхэд, залуучуудад эх үрийн нандин холбоог мэдрүүлэх, ээждээ хэлж чадаагүй сэтгэл зүрхний үгээ захидлаар дамжуулан илэрхийлэх боломж олгох цаашлаад эх хэлээрээ зөв, сайхан бичих, уран яруу үг хийгээд найруулга зүйн хэм хэмнэлийн чадварыгнэмэгдүүлэхэд оршдог байна. Түүнчлэн захидал гэдэг нь сэтгэлийн гүн дэх үнэн үгээ илэрхийлэх боломж олгодог харилцааны нандин хэрэглүүр гэдгийг ойлгуулах зорилготой юм. Аймгийн хэмжээнд явагддаг захидлын уралдаанд энэ жил Эрдэнэт, Сэлэнгэ, Дархан аймгуудаас захидал ирсэн нь уралдааны цар хүрээ тэлж буйг харуулж байгаа юм. Насанд хүрэгчид, хүүхдийн гэсэн ангиллаар 2014 оноос хойш уламжлан зохиож буй энэ удаагийн уралдаанд нийт 200 гаруй захидал иржээ. “Архангайн толь” сонин “Онцлох” захидлын эзнийг тодруулдаг. ЭБ сумын 4-р сургуулийн 6а ангийн сурагч Ж.Тэмүүжин энэ жилийн “Онцлох” захидлын эзнээр тодорчээ. Хүүхдийн насны ангилалд Лаборатори 1-р сургуулийн 12а ангийн сурагч Д.Ринчендоржийн ээждээ бичсэн захидал 1-р байранд орсон байна. Насанд хүрэгчдийн ангилалд ээждээ бичсэн захидлаараа Лаборатори1-р сургуулийн багш Ц.Цэрэнбалжид түрүүлсэн юм. Шалгарсан захидлыг “Архангайн толь” сониндоо нийтэлж, телевизийн нэвтрүүлэг болгон гаргах юм. Мөн бусад захидлуудыг ээжүүдэд нь дамжуулж өгөх ажээ Захидлын уралдааныг Б.Хүрэлхуяг захиралтай “Бага Рашаант” ХХК, С.Раднаа захиралтай “Хадат Хужирт” ХХК, П.Төмөрцэцэг тэргүүнтэй “Тэнгэрлэг ертөнц далд ухамсар” ТББ, “Ар тооромт” эмнэлэг, Б.Буян-Ундрах захиралтай “Амтлаг” бэйкэри, Мобиком корпорацийн Архангай салбарын хамт олон, Монцаме агентлагийн орон нутаг дахь сэтгүүлч Б.Гэрэлт-Од, “Миний Архангай” үндэсний тоглоомыг үүсгэгч Х.Батбаяр, Эрдэнэмандал сумын ИТХ-ын төлөөлөгч М.Батдорж, Цахир сумын ИТХ-ын төлөөлөгч Н.Баянмөнх нар ивээн тэтгэжээ.

Архангай аймагт хорио цээрийн дэглэм тогтоов

28661196_1882368675318914_3136742211039474101_n Архангай аймгийн Засаг даргын 3-р сарын 4-ний өдрийн 84 тоот захирамжаар Хотонт сумын Бургалдай баг, Өгийнуур сумын Дойт багийн нутагт мал амьтны гоц халдварт шүлхий өвчин гарсантай холбогдуулан 2018 оны 3-р сарын 3-ны өдрөөс эхлэн хорио цээрийн дэглэм тогтоолоо. Хорио цээрийн дэглэм тогтоосон бүс нутагт малын шилжилт хөдөлгөөн хийх, малын мах бэлтгэх, малын гаралтай сүү, цагаан идээ, түүхий эд бүтээгдэхүүнийг зөөвөрлөх, худалдан борлуулах, хүн тээврийн хэрэгслээр орох, гарах хөдөлгөөнийг зогсоосон байна. Захирамжаар голомтын бүсийг тогтоох, хорио цээрийн дэглэм сахиулах, эргүүл пост гаргах, ариутгал халдваргүйжүүлэлтийн цэгүүдийг байгуулж ажиллахыг аймгийн Засаг даргын захирамжаар байгуулагдсан шуурхай бүлэг, Хотонт, Өгийнуур сумын Засаг дарга нарт үүрэг болголоо. Мөн дээрх сумуудад олон нийтийг хамарсан арга хэмжээ, хурал зөвлөгөөн, морины уралдаан зохион байгуулахыг хориглов.

Батцэнгэл сумын малчдыг төрийн дээд одон медалиар шагнав

28504501_1534437373345123_1153481044_o Архангай аймгийн Батцэнгэл суманд тийн унжлагат хэмээх шороон нохой жилийн шинийн 8-ны билэгт сайн өдөр мал аж ахуйн салбарт олон жил үр бүтээлтэй ажилласан малчдад төрийн дээд одон медалийг хүртээжээ. “Хөдөлмөрийн гавьяаны улаан тугийн одон”-гоор тус сумын Цац багийн малчин Самдангийн Досмоо, “Алтан гадас” одонгоор Цац багийн малчин Дүгэрсүрэнгийн Цэрэнчимэд, Бадамдоржийн Дашжамц, Хөдөө аж ахуйн тэргүүний ажилтан цол, тэмдгээр Дэл багийн малчин Пүрэвжавын Нэргүй нар шагнагдсаныг ЗГХЭГ-ын Референт Ч.Хүрэлчулуун, аймгийн ИТХ-ын дарга Б.Өсөхбаяр болон сумын удирдлагууд гардуулж өгчээ.

Малын “А” данс олдохгүй байгаа малчдын мал маллаж байсан хугацааг шүүхээр тогтоолгохоор болов

b599f65c3bae6e811f19c6122a88c211original Архангай аймгийн Нийгмийн даатгалын хэлтэс Шүүхийн газартай санал солилцсоны үндсэн дээр малын “А” данс олдохгүй байгаа малчдын мал маллаж байсан хугацааг шүүхээр тогтоолгохоор боллоо. Малчин-даатгуулагчийн өндөр насны тэтгэвэр тогтооход зарим сумдын малын “А” дансны бүртгэл устаж үгүй болсонтой холбоотойгоор хүндрэл бэрхшээл тулгарч байгааг сумын холбогдох мэргэжилтнүүд хэлж байна. Энэ асуудлыг шийдвэрлэх асуудлын хүрээнд шүүхийн шүүгч нартай санал солилцож нэгдсэн ойлголтод ийнхүү хүрчээ. Архангай аймагт энэ онд 2300 орчим малчин-даатгуулагч тэтгэвэрт гарахаар байгаа ч зарим сумын малчдын “А” данс олдохгүй байгаа ажээ.